Sulmuesi, Vedat Muriqi duke luajtur një ndeshje të madhe në La Liga, ka regjistruar dy asistime për ta ndihmuar fitoren e Mallorcas ndaj Athletic Bilbaos.
Sonte në kuadër të xhiros së 24-t të kampionatit spanjoll, Mallorca fitoi 3:2.
Salva Sevilla realizoi penallti për rezultatin 1:0 në të mirë të Mallorcas. Ai shënoi në minutën e 22-të.
Sulmuesi kosovar, Muriqi, asistoi në minutën e 30-të për Angel Rodriguez që shënoi për 2:0. Muriqi pasoi me kokë. Bilbao shënoi dy gola të shpejtë në pjesën e dytë për të barazuar shifrat në 2:2. Në minutën e 59-të shënoi Raul Garcia, ndërsa vetëm dy minuta më vonë realizator ishte Alex Berenguer. Megjithatë vendasit nuk u ndalën.
Në minutën e 88-të, topi në zonë erdhi te Muriqi. Ai e shtyu para, por e la për japonezin Takefusa Kubo. Kubo goditi dhe topi përfundoi në rrjetë. Goli nga disa faqe të internetit i është evidentuar Kubos e disa portierit Unai Simon si autogol. Mallorca ia ka evidentuar golin japonezit. Për Muriqin ishte ndeshja e dytë në La Liga. Në të parën kishte shënuar gol.
Mallorca ka fituar pikë të rëndësishme në garën për mbijetesë. Ajo ka grumbulluar 26 pikë nga 23 ndeshje. /albora.ch/
