Një kryebashkiak lokal dhe shoferi i tij janë arrestuar në një shkretëtirë në veri të Nigerit me më shumë se 200 kg kokainë në automjetin e tyre. Lajmin e ka bërë të ditur Policia e vendit, shkruan BBC, përcjell albora.ch.

Dy të dyshuarit, emrat e të cilëve nuk janë bërë të ditur, dyshohet se po transportonin drogën në Libi, pasi ajo ishte kontrabanduar në vend nga Mali.

Agjencia e policisë së drogës në Niger tha se ishte sasia më e madhe e kokainës e kapur në vendin e Afrikës Perëndimore.

Kontrabanda e drogës dhe konfiskimet nga policia po bëhen më të zakonshme në rajon.

Zyra Qendrore e Nigerit për Represionin e Trafikut të Paligjshëm të Drogës (OCRTIS) tha të mërkurën se policia kishte qenë në dijeni të një sasie të madhe kokaine që transportohej përmes vendit drejt Libisë dhe kishte ndjekur gjurmët.

“Hetimi çoi në sekuestrimin më 2 janar të 199 tullave kokainë – me peshë totale 214 kg – në një automjet që i përkiste zyrës së kryetarit të bashkisë në Fachi”, tha zëdhënësja e OCRTIS-së, Nana Aichatou Ousmane Bako.

Automjeti ishte larguar nga Fachi dhe ishte nisur drejt Libisë për në qytetin e Dirkou-t kur u ndalua të dielën.

“Është hera e parë që vendi ynë ka sekuestruar një sasi kaq të madhe kokaine”, tha Bako, duke shtuar se droga po shkonte drejt Evropës, ku ajo kishte një vlerë të përllogaritur në rrugë prej rreth 19 milionë dollarë

Kryetari i bashkisë dhe shoferi i tij u dërguan në kryeqytetin e Nigerit, Niamey, për t’u marrë në pyetje.

Fachi është një oaz në shkretëtirën Tenere rreth 400 km (250 milje) në veri të qytetit të Agadez. Njihet si qendër tregtare për kripë dhe hurma.

Rajoni përdoret si një rrugë për lloje të shumta trafikimi – të tilla si lëvizja e drogës midis Amerikës së Jugut dhe Evropës dhe kontrabanda e emigrantëve. /albora.ch/