Trajneri spanjoll, Pep Guardiola, i pyetur për pushtimin rus të Ukrainës, tha se askush nuk kishte bërë asgjë në fillim të viteve 1990 për të parandaluar luftën në ish-Jugosllavi.
“Kjo ndodhi në Jugosllavi dhe askush nuk bëri asgjë – ka shumë luftëra në botë. Njerëzit e pafajshëm do të vdesin edhe pse gjithçka që duan është të jetojnë në paqe”, tha në një konferencë shtypi 51-vjeçari Pep Guardiola, trajneri i Manchester Cityt.
“Në të gjithë botën, njerëzit duan vetëm një shtëpi, flenë mirë, kanë ushqim në tavolinë dhe kanë njerëz që duan”, shtoi Guardiola, një mbështetës i lëvizjes për pavarësi të Katalonjës nga Spanja.
Guardiola tha se njerëzit e pafajshëm paguajnë gjithmonë një çmim të tmerrshëm për vendimet e marra nga disa.
“Si shoqëri, ende nuk kemi mësuar se çfarë na ka ndodhur në të kaluarën. Në Ukrainë, në Siri… .në shumë vende. Në fund, pala më e fortë vret gjithmonë atë më të dobëtin”, shtoi ai. /albora.ch/
