Ish sekretarja amerikane e shtetit kujtoi përshtypjen e saj të parë për presidentin rus në rubrikën e fundit që shkroi për The New York Times.
Madeleine Albright, vetëm disa javë para vdekjes së saj të mërkurën në moshën 84-vjeçare, parashikoi se presidenti rus Vladimir Putin “po bënte një gabim historik” me atë që ishte atëherë pushtimi i tij ushtarak i planifikuar në Ukrainë.
“Nëse ai pushton, do të jetë një gabim historik,” paralajmëroi Albright, gruaja e parë që shërbeu si sekretare e shtetit të SHBA-së”.
“Në vend që t’i hapte rrugën Rusisë drejt madhështisë, pushtimi i Ukrainës do të siguronte turpin e zotit Putin duke e lënë vendin e tij të izoluar diplomatikisht, ekonomikisht të gjymtuar dhe strategjikisht të cenueshëm përballë një aleance perëndimore më të fortë dhe më të bashkuar”, shkroi ajo.
Forcat ruse pushtuan Ukrainën të nesërmen.
Mes rezistencës së ashpër të Ukrainës, deri më sot raportohet se janë vrarë deri në 15,000 trupa ruse. Aleatët e NATO-s kanë denoncuar me vendosmëri agresionin e Putinit dhe sanksionet ekonomike të vendosura nga Perëndimi që po mbytin ekonominë e Rusisë.
Albright shkroi për takimin me Putinin në vitin 2000, kur presidenti i atëhershëm rus “foli në mënyrë jo emocionale” për “vendosmërinë e tij për të ringjallur ekonominë e Rusisë”.
Në shënimet që ajo regjistroi në atë kohë, Albright e përshkroi Putinin si “të vogël dhe të zbehtë” dhe “aq të ftohtë sa të ishte pothuajse zvarranik”.
“Putini është i turpëruar nga ajo që i ndodhi vendit të tij dhe i vendosur të rivendosë madhështinë e tij”, tha ajo. /albora.ch/
