Policia doganore në portin e Durrësit ka gjetur 500 mijë euro të padeklaruara në autobusin e linjës Bari-Durrës.
Abc mëson se eurot ishin fshehur në tavanin e mjetit.
Agjentët kishin informacion për transportin e parave të padeklaruara e për këtë arsye kaluan autobusin në skaner.
Edhe pse nuk është bërë ende numërimi i parave, nga sasia duket se bëhet fjalë për një shumë rreth 500 mijë eurosh.
Policia ka arrestuar shoferin dhe njëherësh pronar të autobusit Elidon Çela si edhe ndihmësin e tij.
Njoftimi paraprak i Policisë
Durrës/Informacion paraprak.
Në portin e Durrësit, si rezultat i një hetimi njëmujor të kryer nga Policia Kriminale e DVP Durrës, për mundësinë e futjes së një shume të madhe eurosh në vendin tonë, nëpërmjet portit të Durrësit, gjatë ditës së sotme, në kuadër të operacionit policor të koduar “Eurot”, është ushtruar kontroll i imtësishëm nga Seksioni kundër Krimit Ekonomik dhe Financiar i DVP Durrës.
Si rezultat i informacioneve dhe konrollit të imtësishëm, në pjesën e sipërme të një autobusi janë gjetur të fshehura 6 qese plastmasi, brenda të cilave kishte disa pako, me rreth 500 000 euro.
Nga Policia e DVP Durrës janë shoqëruar disa persona dhe vijon puna për numërimin e saktë të sasisë së eurove dhe për identifikimin e kapjen e personave të përfshirë.
Në përfundim të veprimeve do të japim informacion të plotë.
