Një grua në Sudan është dënuar me vdekje me gurë për tradhti bashkëshortore, rasti i parë i njohur në vend pas gati një dekade.
Maryam Alsyed Tiyrab, 20-vjeçare, u arrestua nga policia në shtetin e Nilit të Bardhë të Sudanit, muajin e kaluar.
Tiyrab thotë se po apelon kundër vendimit. Pjesa më e madhe e dënimeve me gurë, të cilat janë kryesisht kundër grave, anulohen në gjykatën e lartë.
Aktivistët shqetësohen se dënimi është një shenjë se grushti ushtarak i tetorit i ka inkurajuar ligjvënësit që të heqin dorë nga të drejtat e grave, të bëra nën qeverinë tranzitore të vendit.
Në vitin 2020, qeveria kalimtare e Sudanit, e cila pasoi rrëzimin e Omar al-Bashir, njoftoi reforma në disa nga ligjet e saj penale të linjës së ashpër dhe politikat e sheriatit. Reformat nuk përfshinin goditjen me gurë, por në gusht vendi ratifikoi konventën e OKB-së kundër torturës.
Goditja me kamxhik, e cila u shpall e jashtëligjshme në vitin 2020, ende jepet si dënim nga gjykatat, raporton Guardian, transmeton Klankosova.tv.
Rasti i fundit i njohur i një gruaje të dënuar me gurë për tradhti bashkëshortore ishte në shtetin e Kordofanit të Jugut në vitin 2013. Dënimi më pas u anulua.
