Sipas “The Atlantic”, në vitin 2018 një student i doktoraturës në Harvard, Andres Ardisson Korat kreu një studim dhe doli në një përfundim paradoksal. Ne mund ta kemi lidhur akulloren si një ëmbëlsirë që përmban sheqer dhe për këtë arsye nuk është një zgjedhje e shëndetshme, por duket se për ata me diabet, ngrënia e akullores shoqërohej me një rrezik më të ulët të problemeve të zemrës.
Ndërkohë, shkencëtarët janë ende të hutuar nga gjetjet e Ardisson Korat, por le të fillojmë nga fillimi.
Gjatë viteve 1980, studiuesit e Harvardit filluan të mbledhin “pyetësorë të shpeshtësisë së ushqimit” dhe të dhëna mjekësore nga mijëra punonjës shëndetësorë. Studimi i parë vëzhgues i universitetit për diabetin e tipit 2 dhe produktet e qumështit u botua në vitin 2005. Hulumtuesit më pas arritën në përfundimin se konsumi më i lartë i bulmetit me pak yndyrë lidhej me një rrezik më të ulët të diabetit.
“Reduktimi i rrezikut të diabetit ishte pothuajse ekskluzivisht i lidhur me qumështin me pak yndyrë ose pa yndyrë,” shpjegoi një njoftim për lajmet e Harvardit në atë kohë. Sipas rezultateve, meshkujt që konsumonin dy ose më shumë racione qumësht të skremuar ose me pak yndyrë në ditë kishin një rrezik 22% më të ulët të diabetit. Këto përfundime forcohen me kërkimin e Andres Ardisson Korat.
Por si mund të shpjegohet vlera ushqyese e akullores dhe mbrojtja që ajo ofron ndaj diabetit?
Kjo për shkak se shumica e proteinave në akullore vijnë nga qumështi, me këto proteina që krijojnë një indeks të ulët glicemik për shkak të fermentimit që kanë pësuar. Yndyra që përmban akullorja parandalon përthithjen e shpejtë të sheqerit dhe për këtë arsye ndihmon me sindromën e rezistencës ndaj insulinës.
Megjithatë, këto përfundime janë ende konfuze për shkencëtarët, të cilët po bëjnë thirrje për kërkime të mëtejshme mbi këtë çështje.
