NATO është “në mes të një transformimi themelor” që do të ketë “pasoja afatgjata” për veprimet e presidentit rus Putin.
Sekretari i përgjithshëm i NATO-s, Jens Stoltenberg, tha për Telegraphin britanik se NATO po punon për planet për një prani të përhershme ushtarake në kufijtë e saj lindorë, në kontekstin e përballjes me agresionin eventual rus.
NATO është “në mes të një transformimi themelor” që do të ketë “pasoja afatgjata” për veprimet e presidentit rus Vladimir Putin, tha Stoltenberg.
“Jemi dëshmitarë të një realiteti të ri, një “normaliteti të ri” për sigurinë evropiane. Prandaj ne u kemi kërkuar komandantëve tanë ushtarakë që të ofrojnë opsione për atë që ne e quajmë rivendosje, një rregullim afatgjatë të NATO-s,” tha Stoltenberg, duke theksuar se trupat ushtarake në vendet anëtare të Evropës Lindore duhet të bëhen një “parandalues i plotë”.
Stoltenberg, i cili mund të vazhdojë mandatin e tij në krye të Aleancës me një vit për shkak të situatës në Ukrainë, zbuloi në bisedë se vendimet për gjithçka do të merren Në Samitin e NAO-s që do të mbahet në qershor në Madrid.
Pushtimi rus i Ukrainës ka shkaktuar krizën më të madhe të refugjatëve në Evropë që nga Lufta e Dytë Botërore dhe ka bërë që vendet perëndimore të rishqyrtojnë politikën e tyre të mbrojtjes.
Në një intervistë për Telegraphin, sekretari i përgjithshëm i NATO-s tha gjithashtu se lufta në Ukrainë po hyn në një fazë të re dhe tha se dallimet në armatimin “sulmues” dhe “mbrojtës” që disa anëtarë të aleancës i kishin vënë në dukje për sa i përket dërgesave në Kiev, nuk janë më të rëndësishme.
“Ukraina tani po mbrohet nga pushtimi, kështu që gjithçka që bën është me natyrë mbrojtëse. Ata po mbrojnë vendin e tyre, popullin e tyre me shumë armë të llojeve të ndryshme, nga armët e vjetra sovjetike deri te ato moderne që u dërgohen atyre nga vende si MB. Nga armët më të lehta në ato më të rënda. Gjithçka që po bën Ukraina me këto armë është mbrojtëse. Ne po flasim këtu për të mbrojtur veten nga pushtimi, nga forca brutale ushtarake që ka pushtuar vendin e tyre,” shpjegoi Stoltenberg.
“Tani ne po hyjmë në një fazë të re të kësaj lufte. Rusia ka lëvizur forcat e saj nga veriu, por ato nuk po tërhiqen, por po rigrupohen dhe po ripozicionohen për betejën vendimtare në Donbas. Kjo do të pasojë në javët e ardhshme”, tha Stoltenberg.
