Dhjetra njerëz mbetën të bllokuar për orë të tëra brenda Eurotunelit pasi një tren nga Calais në Folkestone ishte prishur.
Pamjet tregojnë pasagjerët e Eurotunnel Le Shuttle duke u evakuuar përmes një tuneli shërbimi emergjence pasi duhej të braktisnin automjetet e tyre.
Ata u transferuan përfundimisht në një tren zëvendësues dhe u dërguan në terminalin Folkestone në Kent.
Le Shuttle tha se alarmet e trenit ranë dhe kjo duhej të hetohej, raporton BBC.
Le Shuttle, e cila transporton automjete përmes tunelit, fillimisht tha në Twitter se një tren ishte prishur, por më vonë shtoi për BBC se një tren në të vërtetë nuk ishte prishur, por alarmet që dilnin nënkuptonin hetime.
Të gjithë ata që ishin në bord u transferuan “në përputhje me procedurat e sigurisë dhe si masë komoditeti”, tha Le Shuttle.
Një pasagjer kontaktoi BBC-në para orës 17:45 duke thënë se ishin në trenin që kishte ndaluar. Pasagjeri u ankua për komunikim të dobët, pasi sistemi tannoy nuk funksiononte siç duhet.
Një tjetër udhëtar shkroi në Tëitter se njerëzit duhej të braktisnin automjetet e tyre në tren dhe po përcilleshin jashtë në këmbë.
Zëdhënësi i Le Shuttle tha më vonë se trafiku i pasagjerëve ishte i lehtë në anën e Folkestone.
Por klientët që udhëtonin nga Calais u këshilluan të mos udhëtonin në terminal të martën mbrëma.
“Për shkak të defektit të hershëm të trenit, ju këshillojmë të mos udhëtoni në terminal sonte”, shtoi Le Shuttle. “Ju lutemi të arrini pas orës 6 të mëngjesit nesër.”
Shërbimi transporton pasagjerët dhe automjetet e tyre midis Folkestone dhe Calais.
Me 37.9 kilometra, ai ka seksionin më të gjatë nënujor të çdo tuneli në botë.
