“Kjo nuk mund të zgjidhet për një muaj. Por në një farë kuptimi janë shumë para, ne i japim Rusisë gati një miliardë euro në ditë për energji dhe e keni të qartë se ne në mënyrë indirekte po financojmë luftën”, tha ministri italian Cingolani.
Për arsye etike, Italia duhet “së shpejti” të ndalojë blerjen e gazit rus, të ardhurat e të cilit Rusia i përdor për të financuar luftën në Ukrainë, tha Ministri i Tranzicionit Mjedisor Roberto Cingolani në një intervistë të botuar të enjten.
“Për mendimin tim, ne duhet të ndalojmë së shpejti blerjen e gazit rus për arsye etike”, i tha ai të përditshmes La Stampa.
Ministri ndodhet aktualisht në një vizitë dy-ditore në Angola dhe Kongo me ministrin e Jashtëm Luigi Di Maio për të lidhur marrëveshje të reja furnizimi, duke reduktuar kështu varësinë e Italisë nga gazi rus, i cili mbulon 45 për qind të nevojave të vendit për gaz.
“Aktualisht jemi duke i diversifikuar me shpejtësi burimet tona të furnizimit”, tha ai. “Është e qartë se e gjithë Evropa është shumë e varur nga Rusia për furnizimet me gaz dhe ky ka qenë një gabim serioz gjeopolitik në njëzet vitet e fundit.”
“Kjo nuk mund të zgjidhet për një muaj. Por në një farë kuptimi janë shumë para, ne i japim Rusisë gati një miliardë euro në ditë për energji dhe e keni të qartë se ne në mënyrë indirekte po financojmë luftën”, tha ai.
Ministri parashikon se Italia do të jetë në gjendje të bëjë pa gazin rus në 18 muaj. Ai kishte vlerësuar më parë se gadishullit i duheshin “midis 24 dhe 30 muaj” për këtë.
“Nga mesi i vitit të ardhshëm, ne do të fillojmë të jemi plotësisht të pavarur”, tha ai.
Italia është ndër konsumatorët më të mëdhenj të gazit në Evropë, me 42 për qind të konsumit të saj të energjisë dhe 95 për qind të importeve të saj.
Italia ka nisur një ofensivë diplomatike në Afrikë për të hequr qafe varësinë e saj nga gazi rus: në Algjeri dhe Egjipt para Pashkëve, këtë javë në Kongo dhe Angola dhe në maj në Mozambik.
Qeveria po punon gjithashtu për përgatitjen e një “operacioni termostati” që do të ulë ngrohjen në shkolla dhe zyra me një shkallë dhe do të miratojë një masë të ngjashme në verë për sa i përket ajrit të kondicionuar.
Ky rregull, i cili do të zbatohet si për familjet ashtu edhe për kompanitë private, do të kursejë 4 miliardë metra kub gaz, ose rreth 14 për qind të gazit të importuar nga Rusia, shkruan La Stampa.
Në foto: Roma (Pixabay)
