Mbyllja e hapësirës ajrore për shkak të sulmit rus dhe hapja e kufijve për refugjatët ukrainas ka filluar të ndikojë në lirinë globale të udhëtimit, sipas të dhënave të fundit, duke hedhur dritë mbi rendin me të cilin merren shpesh kërkime të ngjashme, duke iu përgjigjur pyetjes se cilat pasaporta janë më të përshtatshmet.
Kjo temë u trajtua nga firma këshilluese për shtetësinë dhe qëndrimin global me bazë në Londër, Henley & Partners.
Indeksi i tyre rendit 199 pasaporta sipas numrit të destinacioneve që pronarët e tyre mund të kenë qasje pa vizë paraprake. Lista e tyre është një nga disa indekset e krijuara nga kompanitë financiare për të renditur pasaportat globale sipas qasjes që ato ofrojnë për qytetarët e tire. Ajp përditësohet në kohë reale gjatë gjithë vitit, si dhe kur ndryshimet e politikës së vizave hyjnë në fuqi.
Që nga shpërthimi i luftës në fund të shkurtit, shumë vende ose kanë ndryshuar politikat e tyre të hyrjes ose kanë hequr plotësisht vizat për mbajtësit e pasaportave ukrainase, që do të thotë se Ukraina ka shënuar rritje rekord, thuhet në raport.
Ndërkohë, Bashkimi Evropian, Shtetet e Bashkuara dhe Kanadaja kanë ndaluar operatorët rusë nga hapësira e tyre ajrore, ndërsa disa vende nuk u japin më viza qytetarëve rusë, sipas një raporti të firme.
Edhe pse kjo nuk ka ndikuar ende në mënyrë dramatike në pozicionin e Rusisë në listë, raporti sugjeron se kjo ka të ngjarë të ndryshojë në muajt e ardhshëm. Indeksi bazohet në të dhënat ekskluzive të Shoqatës Ndërkombëtare të Transportit Ajror (IATA), dhe monitoron rregullisht pasaportat botërore, të cilat janë më të favorshmet për udhëtim që nga viti 2006.
Në listën për tremujorin e dytë të 2022, Ukraina është rritur me një vend dhe tani renditet e 34-ta, dhe qytetarët e saj tani mund të udhëtojnë në 143 destinacione pa vizë (ose pa vizë pas mbërritjes). Rusia ka zbritur me katër vende në vendin e 49-të, me udhëtime të hapura në 117 vende, me një tendencë për t’u përkeqësuar më tej me formalizimin e pezullimit të vizave dhe sanksioneve.
Ndryshimi i fundit tregon qartë “ndikimin e thellë dhe ndoshta të pakthyeshëm të luftës në lirinë e lëvizjes”, thuhet në raport.
Maja e indeksit mbetet e njëjtë si më parë – Japonia dhe Singapori ndajnë vendin e parë. Mbajtësit e këtyre pasaportave, teorikisht, mund të udhëtojnë në 192 destinacione pa vizë, por vlen të theksohet se kjo nuk merr parasysh kufizimet e përkohshme.
Qytetarët e Afganistanit janë sërish në fund të indeksit dhe vetëm 26 vende mund të aplikojnë pa vizë.
Dominimi i Evropës
Në top 10, Koreja e Jugut është ende e barabartë me Gjermaninë në vendin e dytë, me rezultat prej 190, dhe Finlanda, Italia, Luksemburgu dhe Spanja së bashku janë në vendin e tretë, me rezultat 189.
Ndërsa Austria, Danimarka, Holanda dhe Suedia ndajnë vendin e katërt (188), Franca zbriti në vendin e pestë.
Mbretëria e Bashkuar, e cila hoqi të gjitha kufizimet e mbetura për Covid-19 muajin e kaluar, përparoi një vend (pozicioni 5), pranë Francës, si dhe Irlandës dhe Portugalisë.
Shtetet e Bashkuara mbeten në vendin e gjashtë, me rezultat prej 186, duke ndarë një pozicion me Belgjikën, Zelandën e Re, Norvegjinë dhe Zvicrën.
Nuk ka asnjë ndryshim në numrin shtatë, dhe Australia, Kanadaja, Republica Çeke, Greqia dhe Malta mbeten sërish bashkë, me rezultatin 185.
Në vendin e tetë, Hungaria është e vetme, me rezultat 183, ndërsa Polonia ra nga vendi i tetë në vendin e nëntë në listë, duke ndarë një vend me Lituaninë dhe Sllovakinë, me pikë 182. Estonia, Letonia dhe Sllovenia përfundojnë dhjetëshen e parë me rezultatin 181.
Raporti vë në dukje se situata midis Rusisë dhe Ukrainës ka rezultuar të jetë një kujtesë e ashpër e paqëndrueshmërisë botërore, mënyra se si dhuna dhe konflikti mund të çojnë në zhvendosje masive, dhe sa e rëndësishme është një pasaportë, dhe në fakt përcakton fatin tuaj dhe ndikon në mënyrë dramatike opsionet tuaja.
Edhe pse është e pamundur të parashikohet se si do të duket bota nën hijen e Luftës së Ftohtë të re, indeksi i fundit sugjeron se hendeku midis Rusisë dhe pjesës më të madhe të botës perëndimore vetwm sa do tw shtohet.
Pasaportat më të mira për t’i pasur në 2022:
Japoni, Singapor (192 destinacione)
Gjermania, Koreja e Jugut (190)
Finlandë, Itali, Luksemburg, Spanjë (189)
Austri, Danimarkë, Holandë, Suedi (188)
Francë, Irelandë, Portugali , Mbretëria e Bashkuar (187)
Belgjika, Zelanda e Re, Norvegjia, Zvicra, Shtetet e Bashkuara (186)
Australi, Kanada, Republika Çeke, Greqi, Maltë (185)
Hungaria (183)
Lituani, Poloni, Sllovaki (182)
Estonia, Letonia, Sllovenia (181)
Pasaportat më të këqija:
Disa vende në mbarë botën kanë qasje pa vizë ose vizë pas mbërritjes në më pak se 40 vende. Kjo perfshin:
Koreja e Veriut (39 destinacione)
Nepal, Palestinë (37)
Somali (34)
Jemen (33)
Pakistan (31)
Siri (29)
Irak (28)
Afganistan (26).
