Vendimi i një gjyqtari të gjykatës federale të ShBA-së për të shfuqizuar dekretin për mbajtjen e detyrueshme të maskave në transportin publik u mirëprit nga disa pasagjerë ajror, ndërsa disa pyesnin veten nëse kishte ardhur vërtet koha për të shfuqizuar një nga masat më të dukshme për të luftuar pandeminë e Covid.
Linjat kryesore ajrore dhe shumë nga aeroportet më të ngarkuara kanë vendosur tashmë të hënën të heqin dorë nga mbajtja e detyrueshme e maskave pasi Administrata e Sigurisë në Trafik (TSA) njoftoi se nuk do të zbatonte rregulloren nga janari 2021, e cila zbatohej për aeroplanët, aeroportet, taksitë, trenat, shkruan Zëri i Amrikës.
Megjithatë, vendimi ende parashikon mundësinë e mbajtjes së rregullave për mbajtjen e maskave, gjë që mund të rezultojë në rregullime të ndryshme në qytetet amerikane, raporton Associated Press.
Pasagjerët e United Airlines nga Hjustoni në Nju Jork, për shembull, mund të hiqnin maskat e tyre në aeroport kur ngriheshin në një aeroplan, por ata do të duhej t’i mbanin ato kur ulen në aeroportin e Nju Jorkut ose në metro.
Një video tregon pasagjerët në një fluturim të Delta Airlines, nga Atlanta në Barcelonë, duke duartrokitur ndërsa heqin maskat pasi njoftuan se nuk duhet t’i mbajnë ato.
Në vendim, gjyqtarja e Gjykatës së Qarkut të Floridës, Catherine Kimbal Mizel, deklaroi se Qendrat për Kontrollin dhe Parandalimin e Sëmundjeve (CDC) e tejkaluan autoritetin e saj kur nxorën rregulloren origjinale shëndetësore mbi të cilën bazohet direktiva e Administratës së Sigurisë në Trafik. Ajo gjithashtu vlerësoi se CDC nuk ka ndjekur procedurat adekuate gjatë marrjes së vendimit.
Mizel, e cila u emërua në atë detyrë nga ish-presidenti Donald Trump, deklaroi se mjeti i vetëm juridik është shfuqizimi i dekretit për të gjithë vendin, sepse do të ishte e pamundur të anulohej vetëm për paditësit.
Shtëpia e Bardhë tha se dekreti për mbajtjen e detyrueshme të maskave “aktualisht nuk është në fuqi” dhe vlerësoi se vendimi ishte zhgënjyes.
United Airlines, Delta dhe Alaska Airlines njoftuan shpejt se po heqin mbajtjen e detyrueshme të maskave në fluturimet e brendshme dhe disa ndërkombëtare. American Airlines, Southwest dhe Jet Blue Airways vendosën në mënyrë të ngjashme.
Edhe aeroportet e mëdha kanë hequr dorë nga detyrimi për të mbajtur maska, por kanë rekomanduar që kjo të bëhet vullnetarisht. Përfaqësuesit e sistemit të transportit publik të Nju Jorkut planifikojnë të vazhdojnë t’u kërkojnë pasagjerëve që të mbajnë maska. Në kryeqytetin Uashington, nuk do të kërkohen maska për pasagjerët e metrosë apo autobusit.
Uber tha se maskat rekomandohen, por që nuk janë më të detyrueshme. Përpara vendimit të gjykatës, CDC e zgjati urdhëresën e maskës deri më 3 maj për të pasur më shumë kohë për të studiuar nënvariantin omikron BA.2, i cili tani është përgjegjës për shumicën dërrmuese të rasteve në Shtetet e Bashkuara.
Foto: Pixabay (Ilustrim)
