Ka nisur në Hagë dita e dytë e gjykimit ndaj ish-krerëve të UÇK Hashim Thaçit, Kadri Veselit, Jakup Krasniqit dhe Rexhep Selimit.
Sot është radha e palës mbrojtëse të të akuzuarve për të paraqitur argumentet e tyre para Gjykatës Speciale.
Në ditën e parë të gjykimit më 3 prill, prokurorët e specializuar për të mbrojtur rastin e tyre paraqitën disa komunikata të lëshuara nga UÇK-ja, që thanë se synon kundërshtarët e kësaj ushtrie.
Më 3 prill, pas më shumë se dy vjetësh nga konfirmimi i aktakuzës, nisi gjykimi ndaj Hashim Thaçit, Kadri Veselit, Jakup Krasniqit dhe Rexhep Selimit.
Prokuroria mbajti deklaratë hyrëse për rreth pesë orë, duke pretenduar se ka prova të mjaftueshme për të dënuar ish-krerët e UÇK-së për krime lufte dhe krime kundër njerëzimit.
Në hyrje të seancës, të katër të akuzuarit sërish u deklaruan të pafajshëm për dhjetë pikat e akuzës.
Prokuroria tha se katër të akuzuarit kishin themeluar një “ndërmarrje të përbashkët kriminale” që gjatë periudhës së luftës kishte shënjestruar personat që i ka konsideruar kundërshtarë të UÇK-së.
Në ditën e parë të gjyqit u shfaqën disa prova të prokurorisë në formë të komunikatave të UÇK-së, intervistave televizive, dokumentarëve e shënimeve personale të disa prej të akuzuarve.
