Komiteti i Përfaqësuesve të Përhershëm të BE-së (Coreper) i ka dhënë dritën jeshile miliardës së kohezionit zviceran.
Këtë e ka konfirmuar sot një diplomat i Bashkimit Evropian në Keystone-ATS. Para se të nënshkruhet marrëveshja në parim – e njohur në zhargon teknik si “Memorandumi i Mirëkuptimit” (MoU) – midis Zvicrës dhe BE-së për kontributin e kohezionit zviceran, ajo ende duhet të miratohet nga ministrat e BE-së.
Për këtë arsye, një datë e mundshme është takimi i ministrave të financave të BE-së i planifikuar për të martën më 5 prill në Luksemburg, përcjell albora.ch.
Memorandumi i Mirëkuptimit ka të bëjë me kontributin e dytë të kohezionit të Zvicrës prej 1.3 miliardë CHF. Kjo shumë synon të reduktojë pabarazitë ekonomike dhe sociale midis vendeve të BE-së dhe të ndihmojë shtetet e BE-së në menaxhimin e migracionit.
Në dokument specifikohet shuma e kontributit zviceran, për çfarë qëllimi do të duhet të përdoret, objektivat dhe prioritetet, shkruan zëdhënësi i Komisionit Evropian Balazs Ujvari.
Gjithashtu përmendet se funksionimi i mirëfilltë i tregut të brendshëm është në interes të të dyja palëve dhe “pjesë integrale” e partneritetit Zvicër-BE, shton zëdhënësi./albora.ch/
