Presidenti i Plr Thierry Burkart shpreson për një riorientim të politikës së sigurisë së Zvicrës dhe një afrim me NATO-n pas pushtimit rus të Ukrainës.
Politikani saktëson se Zvicra nuk mund të mbrohet vetë. “Ka shumë pak gjasa që Zvicra të kërcënohet apo të sulmohet nga ndonjë shtet. Nëse kjo do të ndodhte, ka të ngjarë të preken pjesë të tjera të Evropës Perëndimore. Dhe në këtë rast, ne duhet të mbrohemi në mënyrë të arsyeshme në bashkëpunim me shtetet e tjera”, thotë Burkart.
Për më tepër, duke qenë një vend i vogël, Konfederata nuk mund të përballojë mbrojtje të pavarur.
“Zvicra nuk mund të mbrohet nga raketat ndërkombëtare ose me rreze të mesme. Prandaj është i nevojshëm bashkëpunimi dhe trajnimi i trupave me shtetet e tjera për t’i bërë sistemet ushtarake të ndërveprueshme,” shton ai.
Prandaj, sipas këshilltarit kombëtar të Aargaut, blerja e 36 avionëve amerikanë F-35 Lightning II ka kuptim. “Ky avion luftarak do të jetë më i përdoruri në Evropë në të ardhmen. Për të ndërtuar sigurinë në Evropë, NATO do të jetë vendimtare për një periudhë të pacaktuar”./albora.ch/
