Rudolf Hauri, kryetar i shoqatës së mjekëve kantonal, ka thënë se ndonëse vala aktuale e vjeshtës mund të mos ketë arritur ende kulmin, ai nuk pret të njëjtat vështirësi si në vitet e kaluara. Virusi është “më pak i frikshëm” tani, tha ai.
Në një intervistë të botuar nga gazeta zvicerane Blick të mërkurën, Hauri tha se “aktualisht nuk ka indikacione se ne po shkojmë drejt një mbingarkese [spitalesh]”. Ai pret që më pak raste serioze dhe më pak pacientë Covid të përfundojnë në kujdesin intensiv, kryesisht për shkak të shkallës së lartë të imunitetit midis popullatës, e vlerësuar në 97%, shkruan swissinfo.
Megjithatë, Hauri paralajmëroi gjithashtu se situata në spitale mund të bëhet akoma më serioze, veçanërisht nëse numrat e rasteve të koronavirusit vijnë krah për krah me një valë më të fortë të gripit. Duke pasur parasysh mungesën e personelit në spitale, kjo mund të sjellë një tjetër test stresi për sistemin e kujdesit shëndetësor të vendit, tha ai.
Të martën, pas javësh në rritje të numrave, Zyra Federale për Shëndetin Publik (FOPH) raportoi gjithsej 30,305 raste të reja Covid-19 për shtatë ditët e mëparshme – një rënie prej 18% në krahasim me javën e kaluar. U ulën edhe shtrimet e reja. Rreth 9% e shtretërve të kujdesit intensiv aktualisht janë të zënë nga pacientët me Covid-19.
Megjithatë, Hauri paralajmëroi që të mos shihet kjo si fundi i valës aktuale – një interpretim do të ishte i mundur vetëm pas dy javësh, tha ai. Ai tha gjithashtu se shkalla jashtëzakonisht e lartë e pozitivitetit të testit do të thotë se numri real i infeksioneve të reja mund të jetë ende shumë më i lartë se sa raportohet – ndoshta deri në 20,000 në ditë.
