Udhëheqësit kombëtarë, ekspertët e zhvillimit mblidhen në Berlin këtë të martë për një konferencë mbi atë që mikpritësit e saj e përshkruajnë si një “Plan Marshall” për të rindërtuar Ukrainën pas pushtimit të Rusisë.
Konferenca, e organizuar nga kancelari gjerman Olaf Scholz dhe Komisioni Evropian, nuk do të përfshijë premtime konkrete parash për koston e vlerësuar prej 750 miliardë eurosh të rindërtimit, një detyrë që mikpritësit e krahasuan në shkallë me programin ‘Marshall Aid’ të Shteteve të Bashkuara për rindërtimin e Evropës pas Luftës së Dytë Botërore, shkruan Euronews.
Vendimi i Vladimir Putin për të nisur një pushtim të plotë të Ukrainës në shkurt ka rezultuar në mijëra vdekje dhe shkatërrim të shtëpive dhe fabrikave. Ndërsa lufta është dënuar si e paligjshme nga shumica në Perëndim, Moska ende e përshkruan atë si një “operacion special ushtarak” për të çliruar fqinjin e saj nga ekstremistët neo-nazistë.
“Forma e rindërtimit do të formësojë llojin e vendit që do të jetë Ukraina në të ardhmen,” shkruan Scholz dhe presidentja e Komisionit Ursula von der Leyen në edicionin e së hënës të gazetës gjermane Frankfurter Allgemeine.
“Një shtet i qeverisur nga ligji me institucione të forta? Një ekonomi e shkathët dhe moderne? Një demokraci e gjallë që i përket Evropës? Ndërsa duhet të jemi gjithmonë të kujdesshëm me krahasimet historike, ky nuk është më pak se një plan Marshall për shekullin e 21”, shkruan ata duke e konsideruar rindërtimin e Ukrainës si një “detyrë brezash”.
Duke folur në një forum biznesi, Scholz shprehu dëshirat e Gjermanisë që Ukraina mund të bëhet një ditë anëtare e Bashkimit Evropian, një fakt që donatorët duhet ta marrin parasysh kur të përballen me shumat e mëdha që do të kushtonte rindërtimi.
“Lufta e Putinit ka bashkuar vendet tona,” tha ai në forum.
