Sipas Sekretariatit Shtetëror për Migracionin, numri është në rritje, edhe pse në fakt nuk është i qartë numri i saktë i personave që kanë hyrë në vend që nga shpërthimi i luftës.
Që nga fillimi i agresionit rus të enjten e kaluar dhe deri në mëngjes, rreth 150 persona nga Ukraina janë regjistruar në qendrat federale të azilit.
Sekretariati Shtetëror për Migracionin (SEM) i ka treguar Keystone-ATS se numri i regjistrimeve është në rritje. Megjithatë, nuk është ende e mundur të përcaktohet se sa ukrainas kanë hyrë në të vërtetë në Zvicër që nga shpërthimi i luftës. Kjo për shkak se refugjatët mund të hyjnë në zonën Shengen, e për rrjedhojë edhe në Zvicër, pa vizë, transmeton albora.ch.
Në arrati nga lufta
Njerëzit që ikin nga ngjarjet e luftës mund të gjejnë strehim tek individët. SEM është në bisedime me kantonet dhe organizatat jo qeveritare për të koordinuar mbështetjen për ukrainasit që mbërrijnë në Zvicër, tha zëdhënësi i SEM, Daniel Bach.
Dje, Grisons thanë se ishin gati të mirëpritnin refugjatët. Kantoni aktualisht ka kapacitet të mjaftueshëm, tha kreu i Departamentit të Drejtësisë, Sigurisë dhe Shëndetësisë, Peter Peyer (PS). “Strehimoret kantonale janë vetëm gjysmë të mbushura”.
Zviceranët janë të gatshëm t’i mirëpresin
Në platformën online Campax, në mesditën e sotme 6,613 familje zvicerane kishin shprehur gatishmërinë për të mirëpritur refugjatët në shtëpitë e tyre, për gjithsej 15,904 shtretër.
Organizata zvicerane Campax zhvillon fushatat e veta mbi temat e zgjedhjes së saj dhe mbështet individët dhe organizatat e tjera në zbatimin e kërkesave të tyre, thuhet në faqen e saj në internet.
Mbrojtja e të paktën 10 mijë refugjatëve
Në të njëjtën platformë, 21,000 njerëz nënshkruan një letër të hapur drejtuar kreut të Departamentit Federal të Drejtësisë dhe Policisë, Karin Keller-Sutter, duke kërkuar që 10,000 refugjatë tu jepet mbrojtje. Nga ana e saj, revista Beobachter ka krijuar një linjë falas ku mund të bëhen pyetje në lidhje me pritjen e refugjatëve./albora.ch/
