Kantonet mbështesin reduktimin e periudhës së karantinës dhe izolimit, të dyja të përcaktuara në pesë ditë, të shpallur sot nga Këshilli Federal, raporton Ticinonews.

Edhe pse nuk pati konsultime, shumë përfaqësues kantonal ishin në favor të një rregullimi të tillë. 

Periudha më e shkurtër e inkubacionit dhe ngjitja e lartë e variantit Omicron e kanë bërë vendimin e Ekzekutivit “të kuptueshëm”, tha sot në një njoftim për shtyp Konferenca e Drejtorëve Kantonalë të Shëndetësisë (CDS).


Për sa i përket karantinave dhe izolimeve, kantonet tani kanë kohë deri të hënën për të shqyrtuar përjashtimet e mundshme. 

Për temat e tjera të dërguara për konsultim, CDS përmend në veçanti strategjinë e testimit dhe shtrirjen e masave aktuale përtej 24 janarit. 

Drejtuesit e Konferencës thonë se janë në favor të zgjatjeve të tilla. 

Efektet në sistemin shëndetësor nga kjo rritje masive e rasteve ende përbëjnë një të panjohur të madhe, edhe për shkak se numri i lartë i infeksioneve tek më të rinjtë mund të arrijë tek segmenti më i vjetër i popullsisë. 

Nga pikëpamja e politikës shëndetësore, një “politikë laissez-faire” aktualisht nuk është e justifikueshme, thekson CDS. 

Sot, Këshilli Federal vendosi të ulë kohëzgjatjen e izolimit nga dhjetë në pesë ditë dhe karantinës nga shtatë në pesë ditë.

Si më parë, për të dalë nga izolimi një person duhet të jetë pa simptoma për të paktën 48 orë. 

Për sa i përket karantinës, ai do të kufizohet për ata që jetojnë në të njëjtën familje ose që në mënyrë të ngjashme, kanë kontakte të rregullta dhe të ngushta me një person që rezultoi pozitiv. 

Personat që kanë marrë dozën e fundit të vaksinës ose janë shëruar për më pak se katër muaj, përjashtohen nga karantina.

Propozime të tjera – si vlefshmëria e certifikatës Covid ose zgjatja e masave aktuale – në vend të kësaj janë dërguar për konsultim dhe vendimet do të merren dhe do të komunikohen javën e ardhshme. /albora.ch/