19-vjeçarja shqiptare Eralda Spahillari, mesnatën e së shtunës mbeti e vdekur si pasojë e një aksidenti tragjik në Itali.
E reja shqiptare ëndrronte të kthehej në Shqipëri dhe të jetonte bashkë me të fejuarin e saj, Mikele Tatanin, po ashtu shqiptar.
Eralda ka lindur në Greqi, por familja e saj është me origjinë nga Durrësi. Ajo studionte për estetikë, profesion të cilin mendonte ta bënte në Shqipëri, ku donte të kthehej dhe të hapte biznesin e saj.
19-vjeçarja jetonte në Negrisia, një zonë në Ponte di Piave, bashkë me prindërit dhe dy vëllezërit e saj, Florianin dhe Erindin.
“Ishte një vajzë e fortë dhe shumë bujare”, është shprehur Amelia, shoqe klase me shqiptaren e cila mëngjesin e së dielës vendosi një buqetë me lule në vendin e aksidentit në Gorgo al Manticano.
“Dua ta bëj këtë homazh për ta kujtuar atë. Shpresoj që të shkoj në spital t’i them mirupafshim të fejuarit të saj. Me atë ajo ëndërronte që të krijonte një të ardhme”, tregon Amelia.
Ka qenë pikërisht i fejuari i saj që ka qenë në drejtimin e mjetit tip BMW 420 që u përplas. Së fundmi çifti kishte vizituar Parisin, kullën Eiffel dhe Champs Elysees, shkruajnë mediat italiane.
Të shtunën çifti ishte takuar për të kaluar mbrëmjen së bashku. Ata ishin drejtuar nga Motta drejt Oderzo-s, por një parakalim i gabuar rezultoi fatal për Eraldën dhe një vajzë tjetër 17-vjeçare, Barbara Brotto, e cila mbeti po ashtu e vdekur. Mikele dhe një djalë tjetër që ndodheshin po ashtu në makinë u plagosën.
Në Negrisia, në apartamentin ku jetojnë familjarët e Eraldës nuk kanë dëshirë që të flasin. Atje kanë shkuar të afërm dhe miq të së resë për të ngushëlluar prindërit dhe vëllezërit e saj.
Sa i përket dy personave të tjerë në makinë deri më tani është bërë i ditur emri i 17-vjeçares Barbara Brotto që ndërroi jetë, ndërsa emri i djalit tjetër të plagosur nuk është bërë ende publik.
Menjëherë pasi kanë mësuar ngjarjen në rrjetet sociale ka pasur shumë reagime nga të njohur të vajzës.
“Na dhemb zemra e po na digjet shpirti me këto ngjarje. Këto lloj aksidentesh nuk duhet të ndodhin më, fatkeqësi shumë, shumë e madhe, s’ka fjalë që na e lehtëson dhimbjen. Eralda Spahillari, do të të kujtojmë gjithmonë sa të kemi jetë. Zoti i dhentë ishalla Forcë prindërve, motrës, vëllait dhe çdo kujt që ta përballojnë humbjen tende kaq tragjike dhe kaq papritur akoma pa e nisur jetën!! Do na mungosh”, shkruan një e afërme.
