Rregullatori mjekësor zviceran ka miratuar vaksinën Nuvaxovid për të rriturit duke e bërë atë vaksinën e katërt Covid-19 të autorizuar në vend.
Swissmedic njoftoi miratimin e saj të mërkurën duke e bërë Nuvaxovid-in vaksinën e parë të bazuar në proteina që do të licencohet në Zvicër. Firma amerikane bioteknike Novavax kishte aplikuar për miratim më 14 shkurt përmes partnerit zviceran Future Health Pharma.
Ndryshe nga vaksinat e tjera të Covid-19 të miratuara në Zvicër – vaksinat mRNA nga Pfizer/BioNTech dhe Moderna dhe vaksina e vektorit viral nga Johnson & Johnson – Nuvaxovid është një vaksinë e bazuar në proteina. Sipas Swissmedic, ajo përmban një komponent jo-infektiv nga sipërfaqja e virusit SaRS-CoV-2 i cili shkakton një përgjigje imune mbrojtëse kur qelizat imune të trupit bien në kontakt me të. Vaksina përmban një adjuvant për të forcuar përgjigjen imune.
Vaksina duhet të administrohet në dy doza me një interval prej tre javësh. Niveli i mbrojtjes që ofron Nuvaxovid shtatë ditë pas dozës së dytë është 90%. Mund të ruhet në frigorifer deri në nëntë muaj.
“Ne jemi krenarë që Zvicra është pjesë e listës në rritje të vendeve që miratojnë Nuvaxovid-in dhe që njerëzit në Zvicër do të kenë një opsion vaksine Covid-19 me bazë proteinash,” tha CEO i Novavax, Stanley C. Erck.
Vendimi i Swissmedic u bazua në tërësinë e të dhënave paraklinike, të prodhimit dhe të provave klinike të paraqitura për shqyrtim. Kjo përfshin dy prova klinike kryesore të fazës III: PREVENT-19, i cili regjistroi afërsisht 30,000 pjesëmarrës të moshës 18 vjeç e lart në SHBA dhe Meksikë dhe u botua në New England Journal of Medicine.
