GJERMANIA po diskuton garancitë e sigurisë për Ukrainën me aleatët e saj në mënyrë që të përgatitet për periudhën pas përfundimit të luftës në Ukrainë, tha kancelari gjerman Olaf Scholz për kanalin televiziv ARD.
“Ne po diskutojmë me miqtë e ngushtë për garancitë e sigurisë që mund të ofrojmë. Ky është një proces afatgjatë. Është e qartë se situata nuk do të jetë e njëjtë si për një nga anëtarët e NATO-s,” tha Scholz, transmeton Index.hr.
Scholz, i cili mori postin e kryeministrit në dhjetor, akuzohet brenda dhe jashtë vendit se nuk ka treguar lidership gjatë krizës ukrainase dhe kritikohet gjithashtu për mungesën e tij të pretenduar të empatisë ndaj qytetarëve, të cilët për shkak të situatës aktuale, po përballen me inflacionin gjithnjë në rritje të shkaktuar nga ajo krizë.
Por kancelari socialdemokrat, i cili u mbiquajt Scholzomat për shkak të stilit të tij mekanik të komunikimit, pohon se nuk dëshiron të jetë “një nga politikanët që premtojnë diçka çdo javë, por më pas nuk arrijnë të përmbushin 90 për qind të asaj që kanë premtuar”.
“Sidomos në kohë të tilla të vështira, nuk është koha për njerëzit që vazhdimisht thonë diçka, por është koha për njerëzit që sigurohen që të merren vendimet themelore”, tha ai.
I shqetësuar për inflacionin
Scholz thotë se ai është “shumë i shqetësuar” për pasojat e rritjes së inflacionit, por shton se qeveria duhet së pari të vlerësojë ndikimin e paketës së fundit të ndihmës shumë miliardë euro përpara se të miratojë paketat e reja të ndihmës.
“Viti i ardhshëm do të jetë më sfiduesi”, tha Scholz. “Sipas shumicës së përllogaritjeve për këtë vit, rreth 90 për qind e rritjes së çmimit për familjet me të ardhura të ulëta dhe të mesme do të kompensohet nga masat që kemi marrë tashmë”, shtoi ai.
I pyetur nëse i ndjente vetë efektet e inflacionit, ai tha se “vetëm dje” po blinte sende ushqimore dhe dinte të tregonte me saktësi çmimet e një game të gjerë produktesh.
Scholz hodhi poshtë sugjerimet se ai ishte tepër i kujdesshëm dhe i vlerësoi qeverisë së tij një rritje rekord të pagës minimale dhe një ndryshim të madh në politikën e mbrojtjes që i dha fund një refuzimi prej dekadash për të dërguar armë në zonat e konfliktit dhe ngritjen e një fondi modernizimi prej 100 miliardë eurosh.
I pyetur nëse qeveria e tij e koalicionit me të Gjelbërit dhe Demokratët e Lirë do të vendosë kufizime të shpejtësisë në autostrada me qëllim të reduktimit të konsumit të energjisë, Scholz kujtoi marrëveshjen e koalicionit që e përjashtoi këtë opsion.
Në lidhje me pandeminë e koronavirusit, ai tha se në rast të rritjes së ndjeshme të numrit të të infektuarve, Gjermania nuk do të mbyllë më shkollat dhe bizneset, por nuk përjashton mundësinë që të jetë e detyrueshme sërish mbajtja e maskës.
Foto: Arkiv
