Autoritetet në Greqi kanë mundur që të godasin një kartel shqiptaro-grek që si duket kishte mbjellë plantacione kanabisi në Malin e Olimpit. Sipas asaj që raportojnë mediat në vend, mafia shqiptare, në bashkëpunim me trafikantët grekë kanë tentuar të krijojnë kartelin më të madh të kanabisit në Evropë në  malin më të lartë të vendit fqinj.

Marketing

Ndërsa bën paralele me serialin e njohur në Netflix, “Narcos”, Protothema raporton se autoritetet në vend lokalizuan një supe-parcelë prej 40 hektarësh në pesë nivele që do të prodhonte në fazën e parë më shumë se 11 tonë kërp të cilësisë së parë ndërsa fitimet pritej të kalonin 40 milionë euro.

“Biznesi” i madh nisi një vit më parë, me prerjen e qindra pemëve në anën lindore të Olimpit, në lartësinë 1500 metra, krijimin e një sistemi të posaçëm vaditjeje të gjatë disa kilometra nga burimet e Olimpit dhe më pas dhjetëra mushka u përdorën për të transportuar lëndët e para, veglat, por edhe të korrat e “arta”.

Rreth 15 veta punonin për të mbjellat çdo ditë, ndërkohë që organizata ishte kujdesur për gjithçka. Sipas asaj që raportohet në mal qëndronte edhe një person që bënte bukë për punëtorët që punonin në anën lindore të Olimpit, ndërsa kishte edhe gra që kujdeseshin për ushqimin dhe pastërtinë.

Mirëpo versioni grek i “Narcos” u rrëzua pas gati dy muajsh hetime nga EL.AS. dhe operacioni madhor në anën e “egër” të malit të perëndive, ku përfshihen 120 oficerë policie, dronë dhe helikopterë.

Informatori

Fillimi i gushtit. Prokuroria e Narkotikëve të Larisës sapo ka përfunduar një operacion të madh në Agia me identifikimin e më shumë se 2000 fidanëve kanabis, kur bie telefoni. Në anën tjetër të linjës, një zë i thellë i zbulon oficerit se në një zonë të paarritshme të Olimpit lindor ka një super-kultivim kanabisi nga një organizatë kriminale që dëshiron të ngrejë “në vendin tonë kartelin më të madh në Evropë.”

Disa detaje të dhëna nga njeriu anonim, para se të mbyllte me nxitim, i çuan efektivët në përfundimin se informacioni ishte i vlefshëm dhe duhet të hetohej më tej.

Operacioni i koduar “Olympus” koordinohet nga drejtori i përgjithshëm rajonal i Thesalisë, gjenerallejtënant Asterios Mantziokas, i cili informohet për detajet më të vogla dhe ecurinë e hetimeve, ndërsa Prokuroria e Drogës, OPKE, Laboratorët e Krimit, marrin pjesë edhe EKAM dhe mjetet ajrore të Zjarrfikësve.

Dronët ngrihen menjëherë dhe nga një lartësi shumë e lartë skanojnë të gjithë Olimpin. Por nuk mund të zbresin poshtë pasi rrezikon të bien në sy nga rojet e armatosura të plantacioneve dhe të hidhet në erë i gjithë projekti.

Në të njëjtën kohë, moti dhe mikroklima në malin e perëndive, që ndryshon çdo 15 minuta me re dhe erëra të forta, e vështirëson situatën edhe më shumë. U vendos të ngrihej një helikopter i pajisur me kamera me definicion të lartë për të skanuar shpatet e pjerrëta.

Më pas, plani ndryshon dhe oficerët vendosin të formojnë ekipe të vogla kërkimore duke përdorur 4X4 dhe kafshë nëpër shtigje të vështira dhe ecje për shumë orë për të krehur zonën.

Rreziku që të bien mbi vëzhguesit dhe rojet e plantacioneve është i madh dhe për këtë arsye i gjithë operacioni i cili zgjati katër javë, kryhet me sekret të skajshëm.

Edhe uniformat speciale të kamuflazhit mbaheshin nga radhët e policisë për t’u përzier me natyrën e egër dhe për të mos u parë. Në fakt, para se të fillonin ecjen, nëpër lugina, ata e shikonin zonën me dylbi për të mos rënë në postblloqe dhe kurthe të minierëve.

Më në fund, në orët e para të 15 shtatorit, ekipet e zbulimit të Policisë gjejnë objektivin. Në një lartësi prej 1500 metrash, në zonën e malit Olimp Ano Skotina, ata gjejnë atë që kanë kërkuar prej një muaji.

Plantacioni ishte 3 orë ecje nëpër shtigje të vështira. Megjithatë, ajo që ata panë ishte vërtet mbresëlënëse. Plantacioni shtrihet në 5 nivele, me një sipërfaqe totale prej 40 hektarësh. Në zonë kishte ambiente për stafin që ishte zhvendosur atje lart, si dhe mjete për tharjen e bimëve.

Pasi bastisi ambientin, policia arrestoi dy shqiptarë të moshës 31 dhe 47 vjeç.

Sipas policisë, raporton media greke, anëtarët kryesorë të mafies shqiptare donin të ngrinin qendrën e prodhimit të kanabisit me cilësi të lartë në Evropë në malin më të lartë të vendit.

Vendi që ata zgjodhën kërkonte një numër të madh njerëzish për të punuar, por edhe financim, pasi kostot e prodhimit u shumëfishuan për shkak të topografisë së zonës dhe kushteve atmosferike mbizotëruese.

Një vit më parë ata ranë në kontakt me tregtarë të besuar vendas të drogës dhe filluan operacionet. Pasi zgjodhën pesë nivelet në të cilat do të rriteshin fidanët (çdo nivel ishte deri në 20 minuta ecje dhe ngjitje larg nga tjetri), ata filluan me sharrë elektrike me zinxhir kafshësh për të prerë qindra bredha dhe lisa që ndodheshin në vend. Me trungjet e pemëve ata bënë mure për të mos lejuar që dheu të ikte në çdo nivel.

E gjithë kjo përfundoi para se të vinte dimri i kaluar dhe në mars, duke përdorur dhjetëra mushka, ata bartën plehra, fara dhe ilaçe për të filluar të korrat.

Për gjashtë muaj, çdo ditë, rreth 15 veta punonin me shpejtësi në mënyrë që 40 hektarët me mijëra fidanë të rriteshin plotësisht dhe të fillonte korrja në shtator.

Në fakt, karteli kishte ndërtuar një minikomunitet për punëtorët, duke u siguruar gjërat e nevojshme për jetesën e tyre, ndërsa punësonin edhe gra që të kujdeseshin për gjithçka, nga pjekja e bukës deri te pastrimi i punëtorëve. Për më tepër, punëtorët mund të kalonin deri në disa javë të izoluar në vend, ndërsa përdornin një ëireless special për të komunikuar me drejtuesit.

Para bastisjes së Policisë, ata arritën të mbledhin dhe thajnë qindra fidanë, duke bërë “thekë” cilësore rreth 22 kg. Por nuk patën kohë që të vinin mushkat për ta ngarkuar dhe për ta zbritur në qytet.

Kreu dhe karteli

Hetimet e skuadrës së posaçme të Sigurimit nuk përfunduan me operacionin në Olimp, pasi tani, pas çrrënjosjes së plantacioneve, ata kërkojnë liderin që donte të ngrinte kartelin.

Gjithçka tregon se “Eskobari i Greqisë” është një person me burime të shumta financiare dhe me ambicie për t’u bërë numër 1 në prodhimin dhe trafikun e hashashit.

Ai investoi mijëra euro për të ngritur superplantacionin me pesë nivele në Olimp, duke shpresuar se natyra e egër do t’i mbante sekretet e tij të fshehura mirë dhe me më shumë se 11 tonë kanabis do të bënte, në vitin e parë, fitime më shumë se 40 milionë euro.

Më pas, një pjesë e të ardhurave do të investohej duke zgjeruar rrjetin dhe ndoshta duke kultivuar mijëra fidane në malin e perëndive edhe për vitin e ardhshëm.

Nëpërmjet hetimeve për blerjen e lëndëve të para, “marrjen me qira” të mushkave, por edhe rrjedhjen e parave, tashmë policia po përpiqet të gjurmojë drejtuesit operativë të kartelit dhe në fund njeriun që donte të ishte “Eskobari i Greqisë”.

Marketing