Mbi tre milionë qytetarë me rrënjë ruse ose sovjetike jetojnë në Gjermani. Që nga fillimi i luftës në Ukrainë, një numër më i vogël i tyre kanë dalë në rrugë për shkak të akuzave për rusofobinë. Por, pas kësaj fshihet një fushatë e qëllimshme.
Ishte menduar të ishte momenti i tij i lavdisë. Më 3 mars 2022, tetë ditë pas pushtimit rus të Ukrainës, blogeri pak i njohur gjerman Rene H. postoi një video në kanalin e tij TikTok. Në rusisht të rrjedhshëm, ai iu drejtua personalisht presidentit rus Vladimir Putin.
“I dashur zoti Putin”, thotë ai në video, “Më vjen keq që vendet evropiane nuk ju kuptojnë (…) Do të isha i lumtur për këdo që do të dilte në rrugë këtu për ju. Por problemi është se (…) është e pamundur të dalësh në rrugë me flamurin rus, sepse do të arrestoheshe menjëherë. Pse evropianët nuk e kuptojnë se për çfarë është konflikti midis Ukrainës dhe Rusisë? Unë ju mbështes plotësisht. Atje (në Ukrainë) janë vetëm fashistë dhe derra. Do të ishte më mirë të hiqej Zelenskin”.
Videoja e tifozit gjerman të Putinit u bë virale dhe arriti shumë rusishtfolës në mbarë botën që ndjekin mediat e afërta me Kremlinin. Kanali i parë rus i Kremlinit, “First Channel”, raportoi për një “gjerman të guximshëm” që guxoi të mbështeste publikisht Rusinë. Në të njëjtën kohë, padyshim askujt nuk i intereson që shfaqja e flamurit rus në Gjermani nuk është arsye për arrestim. Rene H. thjesht po thotë një gënjeshtër. Në të njëjtën kohë me publikimin e videos, Bashkimi Evropian dhe Shtetet e Bashkuara vendosën sanksione të ashpra ndaj Rusisë për agresionin e saj kundër Ukrainës me synimin për të ushtruar presion ndaj Putinit për të tërhequr trupat e tij nga Ukraina sa më shpejt të jetë e mundur.
Auto-shëtitore nga kozmosi paralel
Dhe është Rene H. i cili, me mikun e tij, “gjermanin rus” (u referohet pasardhësve të anëtarëve të grupit etnik gjerman që jetuan me shekuj në Rusinë e sotme, dhe pas rënies së Bashkimit Sovjetik emigruan kryesisht në Gjermani. ) Christian F, i njohur më mirë si “Igori”, organizoi një shëtitore makinash me mbi 400 makina të dekoruara me flamuj rusë, sovjetikë dhe gjermanë. Më 3 prill, kolona kaloi nëpër Berlin, pasuar nga vështrimet tronditëse të kalimtarëve, disa prej të cilëve protestuan me zë të lartë dhe treguan “gishtin e mesit”.
Disa gra në trotuar qanin, sepse fotot e masakrës në Buçë bënë atë ditë xhiron e botës. “Si mund ta bësh një gjë të tillë, njerëzit po vdesin në Ukrainë,” bërtet Erika B., një gjermane me origjinë ruse, ndërsa kolona kalonte pranë ndërtesës së saj në qendër të Berlinit.
Dy botë përplasen. Dhe pjesëmarrësit e auto-shëtitores habiten: Edhe ne duam vetëm paqe. Por pas vetëm disa pyetjeve, rezultoi se ata e konsiderojnë fitoren e Rusisë në paqe. “E vërteta është në anën e Rusisë,” tha një grua. Një burrë thotë se po të mos përzihej NATO, tani nuk do të kishte luftë në Ukrainë. “Dhe të gjithë nazistët janë atje,” shtoi ai. Një burrë me një bluzë me fytyrën e Putinit thotë se ai është atje sepse dëshiron të mbështesë Rusinë. “Ne nuk do të lëmë të tanët të zhgënjejnë,” tha ai. Një grua e re, e cila erdhi nga Siberia tetë vjet më parë, nuk mund të mos habitet që tani të gjithë janë kundër Putinit. “Ai thjesht dëshiron t’i japë fund luftës që filloi në Donbas në 2014,” thotë ajo.
Një e katërta nën ndikimin e propagandës së Kremlinit
Në të njëjtën kohë u mbajt një kundërtakim me anëtarët e të ashtuquajturit Gjermanët rusë nga lëvizja Demokratët-I. Flamujt ukrainas valëviten në drejtim të kolonës pro-ruse. Aktivisti Alex S. tentoi të ndalonte autokolonën ruse me trupin e tij: “Ky është një veprim propagandistik. Turp të kesh! Gjermanët rusë janë kundër kësaj lufte.“Por mesazhi nuk arrin tek ata për të cilët është menduar.
Janis Panagiotidis, ekspert i migracionit nga ish-Bashkimi Sovjetik, vlerëson se një e katërta e qytetarëve gjermanë që flasin rusisht janë nën ndikimin propagandistik të Kremlinit. Ai i referohet të ashtuquajturit Barometë i Migrimit SVR. “Në fillim të luftës, në atë komunitet kishte ende paqe, por tani është intensifikuar intensiteti i protestave pro-ruse, që lidhet edhe me gjoja rusofobinë”, tha studiuesi.
Politikania demokristiane Medina Schaubert, e cila ka vite që punon si punonjëse sociale në një pjesë të varfër të Berlinit ku jetojnë shumë gjermanë rusë, thotë se shumë prej tyre janë të ndikuar nga propaganda ruse që i siguron se rusofobia mbretëron në Gjermani. Lajme të ndryshme, kryesisht të rreme, që supozohet se mbështesin tezën e rusofobisë gjermane, u përhapën me zjarr përmes Telegramit. Vetëm grupi i miqësisë gjermano-ruse ka mbi 30,000 ndjekës në Telegram.
Schubert njeh një model të ngjashëm si në “rastin Liza” nga viti 2016, kur lajmi i rremë se një refugjat sirian përdhunoi një Lizën e mitur nga komuniteti i rusëve gjermanë provokoi protesta në rrugë në pjesët lindore të Berlinit. Doli se lajmi ishte i pasaktë dhe se pas tij qëndronin rrjetet e djathta ruse dhe gjermane pranë Kremlinit. Alternativa populiste e djathtë për Gjermaninë (AfD), e cila kundërshtoi ardhjen e refugjatëve, përfitoi nga kjo gjendje dhe tërhoqi shumë gjermanë rusë.
“Nuk e kuptoj pse pas këtij rasti autoritetet gjermane nuk e ndaluan punën e mediave si ‘Pervij Kanal’ dhe RTR. “Nuk ka të bëjë me lirinë e fjalës, është propagandë e pastër”, tha Schaubert për DW-në. Ajo dëshmoi për fëmijët që ishin të izoluar në shkollë sepse flisnin pozitivisht për Putinin. “Ata fëmijë nuk kuptojnë më asgjë, sepse janë në shtëpi nën ndikimin e prindërve të tyre që janë fansa të Putinit”. “Fëmijët si viktima të propagandës – më vjen veçanërisht keq për ta”, thotë Schaubert.
Në kanalet e Telegramit, ku mblidhen rusishtfolësit nga Gjermania, po përhapen video të cilat duhet të vërtetojnë “ngacmimet” e studentëve që deklarohen në favor të Putinit. Një video thotë se shkollat janë plot me “propagandë agresive në favor të Ukrainës”. “Të gjithë bërtasin “Lavdi Ukrainës” dhe në fund heshtin ata që mendojnë ndryshe. Ashtu si rusët në Ukrainë”, thotë një studente me origjinë ruse në kanalin e një kundërshtari të njohur të vaksinimit në YouTube.
Mobilizimi i menjëhershëm
Një aktiviste, e cila dëshiron të mbetet anonime, thotë se në videot në rrjetet sociale ka vërejtur se pjesëmarrësit dhe pankartat në protesta të ndryshme pro-ruse janë të njëjta. “Ky është një turne që synon të mobilizojë qytetarët me rrënjë ruse me tezën se janë të rrezikuar në Gjermani”, thotë aktivistja.
Në një tubim në Shtutgart më 9 prill, pjesëmarrësit mbanin pankarta të bëra në mënyrë profesionale, dhe në njërën prej tyre kishte edhe një citim nga diktatori çeçen Ahmad Kadyrov: “Unë kam qenë gjithmonë krenar për popullin tim”. Rreth njëqind pjesëmarrës u mblodhën në tubim. Është një fakt ngushëllues që ky është një numër i vogël në krahasim me rreth tre milionë qytetarë gjermanë me rrënjë ruse ose sovjetike.
