Ditë më parë, gjiganti metalurgjik “NewCo Ferronikeli”, i vendosur në Drenas, bëri të ditur se konglomerati ndërkombëtar me bazë në Turqi “Yildirim”, ka blerë pronësinë e fabrikës me të gjitha pasuritë dhe pronat përreth, pas një marrëveshjeje me Grupin investues BALFIN nga Shqipëria. Që në komunikimin e parë me publikon grupi investiv turk, ka shfaqur qëllimin e qartë që fabrikën për prodhimin e ferronikelit në Kosovë, ta shndërrojë në një histori suksesi.

Marketing

Siç ka bërë të ditur kompania, dy grupet e biznesit, së bashku kanë ndërmarrë të gjitha masat që procesi i tranzicionit të pronësisë të kalojë i qetë, pas nënshkrimit të kontratës përmes së cilës “Yildirim” bëhet pronare e plotë e Ferronikelit.

Ferronikeli, ndër vite ka përfaqësuar pjesën më të madhe të eksporteve të Kosovës, duke përbërë 30% të eksporteve të gjithmbarshme të vendit. Kompania që u themelua në vitin 1984 si ndërmarrje shtetërore, ka qenë në vazhdimësi lojtari kryesor në ekonominë e shtetit, duke qenë prodhuesi, eksportuesi dhe punëdhënësi më i rëndësishëm në vend.

Kush është Grupi YILDIRIM?

Në vitin 1963, Garip Yildirim kishte ngritur një kompani modeste për materiale ndërtimtarie të quajtur “GARIP YILDIRIM DHE TË BIJTË” në Samsun të Turqisë. Që nga themelimi në atë vit, kompania është zgjeruar në vazhdimësi përmes ndërmarrësisë dhe inovacionit të pandalshëm, duke u rritur në një shkallë të një grupi që ka kompanive të shumëllojshme si dhe duke u shndërruar në njërin prej gupeve industriale me rritjen më të shpejtë në Turqi.
Nga viti 2008, kur Grupi Yildirim bëri blerjen e parë ndërkombëtare në Suedi, kompania me bazë në Stamboll të Turqisë, u shndërrua në një forcë globale, me veprimtari që shtrihen në nëntë sektorë, në 51 shtete dhe 4 kontinente të botës. Grupi Yildirim punëson rreth 18 mijë njerëz anembanë botës dhe sot është një prej lojtarëve më të rëndësishëm global në sektorët e metaleve dhe minierave, qymyrit dhe koksit, energjisë, plehrave dhe kimikateve, menaxhimit të porteve, transportit dhe logjistikës, ndërtimit dhe pasurive të paluajtshme, si dhe investime financiare.

Siç është bërë e ditur dhe përmes njoftimit, kompania Yilmaden që vepron nën ombrellën e Grupit Yildirim, tashmë zotëron edhe fabrika të prodhimit të Koksit Metalurgjik me Fosfor të Ulët në Kolumbi si dhe një fabrikë metalurgjike të Ferrovanadiumit dhe Ferromolibdenit në SHBA. YILMADEN Holding punëson mbi 7,500 punonjës në tetë vende: Turqi, Kosovë, Suedi, Kazakistan, Rusi, Shqipëri, Kolumbi dhe SHBA. Kompania eksporton produktet e saj në më shumë se 100 vende të botës, përmes më shumë se 20 qendrave të shpërndarjes, të vendosura gjithandej botës.

Plani i Yildirim për Ferronikelin

Në komunikatën njoftuese për blerjen e kompanisë “NewCo Ferronikeli”, thuhet se Grupi Yildirim ka një interesim të vecantë dhe një plan konkret biznesi që Ferronikelin ta shndërrojë në njërën prej fabrikave më të mira në Evropë për prodhimin e Nikelit. Ky plan, për të cilin kompania do të jap më shumë detaje në të ardhmen, do ta shndërrojë Ferronikelin në një prej kompanive më të vlefshme të Grupit Yildirim.

Ekspertiza e gjatë e grupit turk në fushën e metalurgjisë, pritet t’i sjell stabilitetin e nevojshëm kompanisë Ferronikeli, për të cilën parashihen investime të shumanshme që të veprojë e pacenuar në tregun jo edhe aq stabil botëror të Nikelit dhe energjisë elektrike, që për fabrikën është kostoja më e lartë e prodhimit.

Kapacitetet prodhuese të Ferronikelit mund të rriten dhe krahas saj edhe numri i punëtorëve dhe i eksporteve, duke i kontribuar edhe më shumë ekonomisë kombëtare në Kosovë. Grupi Yildirim, përmes nënkompanisë Yildamen, e themeluar në vitin 2014, ka krijuar një bagazh të vlefshëm në sektorin e metaleve dhe minierave, që mund t’i hyj në punë Ferronikelit për një epokë të zhvillimi.

Dhe krejt në fund, Yildirim do ta vazhdojë serinë e investimeve të nisura nga Grupi Balfin që prekin vlerën e rreth 30 milionë eurove, të cilat kanë krijuar impaktin pozitiv për rritjen e kapaciteteve dhe efikasitetin e prodhimit në fabrikë.

Marketing