“Gjermania po përpiqet të nisë projekte energjetike me Senegalin,” tha kancelari gjerman Olaf Scholz gjatë vizitës së tij të parë në Afrikë.
Scholz filloi vizitën e tij tre-ditore në Afrikë në Senegal, një vend me miliarda metra kub gaz dhe pritet të bëhet një prodhues i madh në zonë, raporton Seebiz.
“Gjermania po përpiqet të reduktojë varësinë e saj nga gazi rus. Ajo ka filluar bisedimet me autoritetet senegaleze për shfrytëzimin dhe furnizimin me gaz natyror,” tha Scholz.
“Kjo është një çështje që ne do ta trajtojmë seriozisht,” tha ai në një konferencë për shtyp së bashku me presidentin senegalez Mackie Sal, duke shtuar se është në interes të të dy vendeve që të vazhdojnë bisedimet.
Scholz tha se Gjermania është e interesuar për projektet senegaleze me energji të rinovueshme.
Sal tha se Senegali është gati të furnizojë tregun evropian. Ai parashikon që Senegali do të prodhojë 2.5 milionë tonë vitin e ardhshëm dhe 10 milionë tonë deri në vitin 2030.
Për sa i përket kërkimit, financimit të projekteve dhe çështjeve të tjera, Sal tha se do të merrte parasysh gjithçka dhe se ishte “i gatshëm të bashkëpunonte me Gjermaninë në këtë kontekst”.
Gjermania ka ftuar Senegalin, i cili aktualisht mban presidencën e Bashkimit Afrikan, dhe Republikën e Afrikës së Jugut të jenë mysafirë në samitin e G7 që do të mbahet në Gjermani në qershor.
Të dy vendet afrikane abstenuan nga votimi për rezolutën e OKB-së kundër sulmit rus ndaj Ukrainës, të cilin Moska e quan një operacion ushtarak special.
Si kryetar i Bashkimit Afrikan, Sal tha se shumë vende afrikane nuk donin të zgjidhnin një anë në luftë, megjithëse e dënonin pushtimin.
“Është shumë e qartë – ne duam paqe. Ne po punojmë për de-përshkallëzimin, armëpushimin, dialogun – ky është pozicioni i Afrikës,” tha presidenti senegalez, duke shtuar se ai do të vizitojë Moskën dhe Kievin në javët e ardhshme.
Foto: Pixabay / Ilustrim
