Karim Benzema është barazuar me Raulin në vendin e dytë në listën e golashënuesve të të gjitha kohërave të Real Madridit.
Benzema ishte në mesin e golashënuesve teksa Real Madridi mposhti Levanten 6-0 në “Santiago Bernabeu” të enjten mbrëma, shkruan goal, transmeton Klankosova.tv.
Kampionët e sapokurorëzuar të La Ligës u rikthyen nga një humbje në derbi ndaj Atletico Madridit me stil, me Vinicius Junior që rrëmbeu një hat-trick.
Benzema tani është golashënuesi i dytë më i mirë i të gjitha kohërave për Real Madridin me 323 gola – të njëjtin nivel që arriti ish-lojtari spanjoll Raul përpara se të largohej nga klubi në vitin 2010.
Cristiano Ronaldo ende ka një epërsi të mirë ndaj dyshes në krye të listës së golashënuesve të klubit, me portugezin që ka shënuar 450 gola gjatë qëndrimit të tij nëntëvjeçar në Bernabeu.
Goli i fundit i Benzemas kundër Levantes ishte goli i tij i 27-të në La Liga këtë sezon dhe i 43-ti në 43 paraqitje në të gjitha garat.
