Zvicra nuk do të ketë asnjë trajtim preferencial ndaj vendeve anëtare të Bashkimit Evropian, paralajmëroi ambasadori i BE-së në Zvicër, Petros Mavromichalis.
“Tregu i vetëm është forca kryesore e BE-së. Ne do të dobësonim tregun e brendshëm nëse do të lejonim një vend mik [joanëtar] si Zvicra përjashtime që vendet anëtare të BE-së nuk i kanë,” tha Mavromichalis për gazetën Neue Zürcher Zeitung në një intervistë.
“Nëse ne fillojmë ta bëjmë këtë, edhe vendet e tjera do ta kërkojnë këtë. Tregu i brendshëm do të bëhej plot vrima,” tha ai, transmeton Swissinfo.ch.
Në rast mosmarrëveshjeje, Gjykata Evropiane e Drejtësisë interpreton rregullat dhe vendos. Kjo duhet të zbatohet edhe për Zvicrën në zonat ku ajo merr pjesë në tregun e brendshëm të BE-së, argumentoi ambasadori. Qeveria zvicerane ka treguar se është në favor të një skenari në të cilin Zvicra nuk do t’i nënshtrohet arbitrazhit nga gjykata evropiane.
Lidhjet midis Brukselit dhe Bernës janë tensionuar që kur Zvicra vendosi papritmas në maj 2021 t’i japë fund diskutimeve prej vitesh mbi një marrëveshje kuadër me bllokun e BE-së.
“Ne ishim shumë të zhgënjyer që Zvicra i ndërpreu negociatat pas më shumë se dhjetë vjetësh,” tha Mavromichalis. Sipas diplomatit, BE-ja aktualisht po shqyrton propozimin e Zvicrës për zgjidhjen e çështjeve të diskutueshme në baza sektoriale në marrëveshje të ndryshme.
Brukseli dëshiron që të gjitha marrëveshjet e aksesit në treg të përfshijnë një mekanizëm ligjor për zgjidhjen e mosmarrëveshjeve, tha Mavromichalis. Disa marrëveshje sektoriale mund të përfshijnë rregullore të tilla si klauzola mbrojtëse, por kjo duhet të jetë përjashtim. Rregullat institucionale si lëvizja e lirë e personave dhe direktivat evropiane nuk duhet të përjashtohen nga marrëveshjet, tha Mavromichalis.
“Zvicra dëshiron marrëveshje të reja aksesi në tregun e përbashkët. Por kjo do të jetë e mundur vetëm nëse zgjidhen çështjet institucionale. Nuk mund të ndërtosh një shtëpi nëse themelet janë të paqëndrueshme.”
