Një gjykatë algjeriane ka dënuar me vdekje 49 persona për vrasjen brutale të një piktori që dyshohej se kishte nisur zjarret shkatërruese, por që në fakt kishte ardhur për të ndihmuar në shuarjen e tyre.
Vrasja në vitin 2021 në rajonin Kabyle të Algjerisë verilindore tronditi vendin pasi imazhet grafike u shpërndanë në mediat sociale. Vrasja erdhi menjëherë pas zjarreve në rajonin malor Berber, nga ku vdiqën rreth 90 njerëz, duke përfshirë ushtarë që përpiqeshin të zbusnin flakët.
Gjyqi i sigurisë së lartë mbi vrasjen e artistit Djamel Ben Ismail përfshiu më shumë se 100 të dyshuar, shumë prej të cilëve u gjetën fajtorë për ndonjë rol në vdekjen e tij.
Ata që u dënuan me vdekje ka të ngjarë të përballen me burgim të përjetshëm, sepse Algjeria ka pasur një suspendim mbi ekzekutimet për dekada. 38 të tjerë u dënuan nga dy deri në 12 vjet burg.
Teksa zjarret shpërthyen në gusht 2021, Ben Ismail shkroi në Twitter se ai do të shkonte në rajonin e Kabyle, 320 kilometra nga shtëpia e tij, për t’u “dhënë dorë miqve tanë” duke shuar zjarret.
Pas mbërritjes së tij në Larbaa Nath Irathen, një fshat i goditur rëndë nga zjarret, disa banorë vendas e akuzuan atë si zjarrvënës, me sa duket sepse nuk ishte nga zona, raporton Guardian.
Ben Ismail, 38 vjeç, u vra jashtë një stacioni policie në një shesh kryesor të qytetit. Policia tha se ai u tërhoq zvarrë nga stacioni ku po mbrohej dhe u sulmua. Në mesin e atyre që po gjykoheshin ishin tri gra dhe një burrë që goditën me thikë trupin e pajetë të viktimës para se të digjej.
Policia tha se fotot e postuara në internet i ndihmuan ata të identifikonin të dyshuarit. Familja e tij e shqetësuar pyeti pse ata që po filmonin nuk e shpëtuan atë.
