I mandatuari për kryeministër Dritan Abazoviq në një konferencë për media prezantoi konceptin e Qeverisë së ardhshme të Malit të Zi. Abazoviq tha se e kishte njoftuar Kuvendin se Mali i Zi ishte gati të merrte Qeverinë e 43-të. Deputeti i Frontit Demokratik Strahinja Bullajiq dha dorëheqjen nga posti i nënkryetarit të Kuvendit, gjë që krijoi kushte për zgjedhjen e qeverisë së re dhe zhbllokimin e punës së Kuvendit. Që nga 1 marsi, kur filluan seancat e rregullta, Bullajiq nuk ka dashur të caktojë asnjë seancë parlamentare, sepse, siç ka thënë ai, vullneti i votuesve i është dhënë qeverisë së re minoritare. Më herët në shkurt ai u shkarkua nga posti i kryetarit të Kuvendit Aleksa Beçiq.
“Ideja është që Mali i Zi të ketë stabilitet, pajtim dhe një perspektivë evropiane në vend të destabilitetit politik.Nuk jemi kundër zgjedhjeve, por jemi kundër zgjedhjeve kur institucionet nuk funksionojnë. Sot nuk do të merresha me kompozimin, edhe pse është i kompletuar, as me ekspozeun, i cila gjithashtu është e përfunduar. Tani u takon deputetëve, ata vendosin se kur do të zhvillohet seanca. Për sa më përket mua, mund të jetë nesër, por është ditë pushimi, kështu që është më realiste të jetë javën e ardhshme”, tha Abazoviq, përcjell gazeta Vijesti .
Ai tha se prioritet i qeverisë së re është marrëveshja për zgjedhjen e bartësve të pozitave më të larta gjyqësore.
“Harmonizimi i rregulloreve në fushën e drejtësisë me atë europiane dhe opinionin e Komisionit të Venecias, reforma zgjedhore, rishikimi në fushën e arsimit dhe kulturës dhe rishqyrtimi i vendimeve të personelit. Rishikimi i të gjitha kontratave të të gjitha qeverive të mëparshme. Vazhdimi i reformës së shërbimeve të sigurisë, duke propozuar Ligjin për regjistrimin e popullsisë”, tha Abazoviq.
Qeveria do të mbështetet në dy shtylla
Kryeministri i mandatuar tha se për sa i përket prioriteteve politike “E humbëm qeverinë e 42-të, sepse nuk gjeti një gjuhë të përbashkët me deputetët”.
“Vazhdimi i luftës kundër krimit dhe korrupsionit, dinamizimi i negociatave me BE-në, vazhdimi i reformave të nisura ekonomike, rregullimi i marrëdhënieve me komunitetet fetare. Vazhdimi i reformës së administratës publike, zhvillimi i balancuar rajonal, pastrimi i listës zgjedhore”, tha Abazovic.
Ai tha se qeveria do të mbështetet në dy shtylla – sundimi i ligjit dhe zhvillimi ekonomik.
Gjithsej 20 ministra
Pres mbështetjen e 46 deputetëve sepse nuk arritëm të arrijmë 49”, tha Abazoviq.
Ai tha se kjo nuk do të thotë se dera s’është e mbyllur për askënd.
“Është e vërtetë që qeveria do të ketë 20 ministra, por do të ketë 18 departamente, jo 20, sepse dy ministra nuk kanë portofol. Ata do të kenë katër nënkryetarë,” tha Abazoviq.
Ai tha se ka obligim që të zhvillojë bisedimet përfundimtare me të gjithë kandidatët për ministra.
“Kur të caktohet seanca, do të publikohen të gjithë emrat. Përshtypja ime është se disa ministri në këtë Qeveri ishin shumë të rënda,” tha Abazoviq.
Qeveria e mëparshme kishte 12 ministri.
Afat më i shkurtër
“Kjo qeveri duhet të ketë një mandat më të shkurtër, ndaj do të jetë detyrim i të gjithë ministrave të rrisin efikasitetin e tyre”, tha kryeministër i mandatuar.
Ai tha se mendon se një numër më i madh i dikastereve nuk do të rrisin shpenzimet, sepse ministritë që janë të ndara do ta “ndajnë buxhetin”.
Abazoviq tha se çështjet më të rëndësishme do të vendosen me shumicë të cilësuar.
“Për mua dy të tretat nuk janë të diskutueshme. Nuk kam ambicie të rivotoj në Qeveri”, tha ai.
